Qusar rayonunun Çiləgir kəndində ciddi infrastruktur problemi yaşanır.
Məsələ ilə bağlı Shimal.News-a danışan kənd sakinlərinin sözlərinə görə, artıq bir neçə gündür ki, kənd ərazisində yoldan su çıxır və vəziyyət getdikcə daha da ağırlaşır.
Bildirilib ki, su asfalt örtüyünün altından sızaraq üzə çıxır və yol boyunca axır. Sakinlər hesab edir ki, problem içməli su xəttində baş verən qəza ilə bağlıdır. Nəticədə yol örtüyü zədələnir, gediş-gəliş isə çətinləşir.
"Bu hal ilk dəfə deyil. Dəfələrlə eyni problem yaşanıb. Aidiyyəti qurumlara müraciət etmişik, amma gəlib baxan yoxdur", - deyə kənd sakinləri bildiriblər.
Sakinlər məsələ ilə bağlı aidiyyəti qurumların təcili tədbir görməsini və problemin aradan qaldırılmasını tələb edirlər.
