Qusar Rayon Məhkəməsində qəsdən sağlamlığa yüngül zərər vurmada təqsirləndirilən Fərəc Bəşirzadənin (adı və soyadı şərtidir) cinayət işi üzrə hökm elan olunub.
Pravda.az-ın məlumatına görə, məhkəmənin qərarı ilə o, 1000 manat cərimə cəzasına məhkum edilib.
Hadisə bu ilin yanvar ayında Qusar rayonu ərazisində yerləşən mağazada baş verib. Sərxoş vəziyyətdə olan şəxs mağazada satıcı kimi çalışan anasından spirtli içki almaq istəyib. Anasının etiraz etməsi nəticəsində aralarında mübahisə yaranıb.
Mübahisə zamanı o, anasına fiziki zor tətbiq edərək üz nahiyəsinə zərbələr endirib. Nəticədə qadın müxtəlif xəsarətlər alıb.
Ekspertiza bu xəsarətləri sağlamlığın qısa müddətə pozulmasına səbəb olan yüngül bədən xəsarətləri kimi qiymətləndirib.
Təqsirləndirilən şəxs məhkəmədə özünü təqsirli bilib, əməlindən peşman olduğunu və anası ilə barışdığını bildirib.
