Qusar rayon sakini Mahir Mayılovun (soyadı şərtidir) qəsdən sağlamlığa ağır zərər vurmaqda təqsirləndirildiyi cinayət işi üzrə məhkəmə prosesi başa çatıb.
Məhkəmənin hökmü ilə ona şərti cəza verilib.
İttihama görə, hadisə 2025-ci ildə Qusar rayonunun Hil kəndində yerləşən bağ sahəsində baş verib. Bildirilir ki, Mahir Mayılov həmkəndlisi Kərəm Nağızadə (adı və soyadı şərtidir) ilə birlikdə spirtli içki qəbul edərkən mərhum qardaşı barədə söhbət düşüb. Bu zaman tərəflər arasında mübahisə yaranıb.
İttihama əsasən, zərərçəkmiş təqsirləndirilən şəxsi təhqir etdikdən sonra Mahir Mayılov ona yumruq, təpik və dəmir boru ilə çoxsaylı zərbələr endirib.
Nəticədə Kərəm Nağızadə ağır bədən xəsarətləri alıb. Məhkəmə-tibbi ekspertizasının rəyinə görə, xəsarətlər insan həyatı üçün təhlükəli olmaqla sağlamlığa ağır zərər vurma kimi qiymətləndirilib.
Məhkəmədə ifadə verən Mahir Mayılov özünü qismən təqsirli bildiyini deyib. Onun sözlərinə görə, hadisədən əvvəl birlikdə spirtli içki qəbul ediblər. Daha sonra zərərçəkmiş onu təhqir edib və ilk fiziki zərbəni də özü endirib.
Təqsirləndirilən şəxs bildirib ki, mübahisə zamanı hər ikisi yıxılıb, sonradan isə zərərçəkmiş ərazini tərk edib. O, hadisənin sonrakı gedişatını tam xatırlamadığını deyib.
Məhkəmə təqdim olunan sübutları araşdırdıqdan sonra Mahir Mayılov barəsində şərti cəza hökmü çıxarıb.
Mənbə: Pravda.az
