Quba rayonunun Qamqam kəndində yaranmış vəziyyət sakinləri çıxılmaz duruma salıb. Kəndi iki hissəyə ayıran Çağacuq çayı üzərində körpünün dağılması səbəbindən insanlar günlərdir digər tərəfə keçə bilmirlər.
Shimal.News-a danışan sakinlərin sözlərinə görə, əvvəllər çayın üzərində dəmir konstruksiyalı körpü olub və həm piyadalar, həm də nəqliyyat vasitələri ondan rahat istifadə edib. Lakin ötən ilin aprel ayında yağan güclü yağışlar nəticəsində yaranan sel körpünü tamamilə dağıdıb.
Bundan sonra kənd camaatı öz vəsaiti hesabına körpünü yenidən bərpa edib. Ancaq bu dəfə də uzunömürlü olmayıb - sonradan baş verən növbəti sel həmin körpünü də yuyaraq aparıb.
Hazırda kənd faktiki olaraq iki hissəyə bölünüb. Sakinlər bildirirlər ki, çayın digər tərəfində qalan evlərə getmək üçün insanlar məcbur qalaraq suyun içindən keçirlər. Bu isə xüsusilə yaşlılar, uşaqlar və xəstələr üçün ciddi təhlükə yaradır.
"Günlərdir kəndin digər tərəfinə gediş-gəliş yoxdur. Xəstəsi olan da var, uşağı olan da. Heç kim maraqlanmır ki, bu insanlar necə hərəkət edir, necə ərzaq alır. Bəlkə ac qalanlar var", - deyə kənd sakinləri narazılıqlarını dilə gətiriblər.
Onların sözlərinə görə, hazırda vəziyyət o həddə çatıb ki, hətta traktor belə çayı keçə bilmir. Sel nəticəsində çayın məcrası dəyişib, dərinlik və axın güclənib.
Sakinlər dəfələrlə aidiyyəti qurumlara müraciət etdiklərini desələr də, problemlərinin həll olunmadığını bildirirlər. Kənd əhalisi heç olmasa müvəqqəti taxta körpünün qurulmasını tələb edir.
Məsələ ilə bağlı Quba Rayon İcra Hakimiyyəti başçısının birinci müavini Tariyel İbrahimovla əlaqə saxladıq. O bildirib ki, oxşar hallara rayonun bir neçə ərazisində rast gəlinir:
"Hazırda vəziyyət araşdırılır, müvafiq qurumlara məlumat veriləcək", - deyə o qeyd edib.
