Bu gün şəhid Cəlil Xeyrullayevin doğum günüdür.
Cəlil Mürvət oğlu Xeyrullayev 1989-cu il mayın 16-da Quba rayonunun İkinci Nügədi kəndində anadan olub. 1996–2007-ci illərdə İkinci Nügədi 3 nömrəli kənd tam orta məktəbində təhsil alıb. Məktəbdə oxuduğu illərdə "Cəsurlar" komandasının üzvü olan Cəlil Xeyrullayev "Şahin" hərbi-idman oyunlarının rayon birinciliyindəki uğurlu çıxışlarına görə məktəb rəhbərliyi tərəfindən fəxri fərmanla təltif olunub. Nişanlı idi.
O, 2007–2009-cu illərdə Azərbaycan Silahlı Qüvvələrinin Gədəbəy rayonunda yerləşən "N" saylı hərbi hissəsində müddətli həqiqi hərbi xidmətdə olub.
2012-ci ildən isə Azərbaycan Daxili İşlər Nazirliyinin Daxili Qoşunlarının sıralarında müddətdən artıq həqiqi hərbi xidmət qulluqçusu kimi xidmət edib. 2012–2018-ci illərdə Quba rayonunda yerləşən "N" saylı hərbi hissədə "Bəbir" Xüsusi Təyinatlı Dəstəsində, 2018-ci ildən isə Gəncə şəhərində yerləşən "N" saylı hərbi hissədə "Pələng" Xüsusi Təyinatlı Dəstəsində xidmət göstərib.
Azərbaycan Daxili İşlər Nazirliyinin Daxili Qoşunlarının çavuşu olan Cəlil Xeyrullayev 2020-ci il sentyabrın 27-də başlayan Vətən müharibəsi zamanı Murovdağ istiqamətində gedən döyüşlərdə, həmçinin Cəbrayılın, Hadrut qəsəbəsinin və Füzulinin azadlığı uğrunda aparılan döyüşlərdə iştirak edib.
Cəlil Xeyrullayev oktyabrın 15-də Füzuli istiqamətində gedən döyüşlər zamanı şəhid olub. Quba rayonunda dəfn olunub.
Cəlil Xeyrullayev ölümündən sonra "Vətən uğrunda" və "Cəbrayılın azad olunmasına görə" medalları ilə təltif edilib.
