Quba şəhərində kişi qeyri-rəsmi münasibətdə olduğu qadına xəsarət yetirməkdə ittiham olunub.
1997-ci il təvəllüdlü Mənsur adlı rayon sakini birgə yaşadığı Zəminə (adlar şərtidir) ilə mübahisə zamanı onun bədəninin müxtəlif nahiyələrinə yumruq və təpiklə zərbələr endirib.
İstintaq materiallarına əsasən, Mənsur 2020-ci ildə Aydan adlı qadınla ailə qurub. 2026-cı ilin aprelində Aydanın atası vəfat etdikdən sonra o, müvəqqəti olaraq Göyçaya, anasının yanına gedib.
Bu müddətdə Mənsur TikTok sosial şəbəkəsində Naxçıvanın Şərur rayonunda yaşayan Zəminə ilə tanış olub. Onu Qubaya dəvət edən kişi əvvəlcə kirayə ev tutaraq birlikdə yaşayıb, daha sonra isə valideynlərinin evinə aparıb.
Təqsirləndirilən şəxsin ifadəsinə görə, iyunun əvvəlində həyat yoldaşı Aydan da evə qayıdıb. Bundan sonra evdə tez-tez mübahisələr yaranmağa başlayıb.
Mənsur hadisə günü Zəminə ilə yenidən mübahisə etdiklərini və ona zərbələr endirdiyini etiraf edib. Zərərçəkmiş də ifadəsində hadisəni təsdiqləyib.
Quba Rayon Məhkəməsinin hökmü ilə Mənsur 6 ay müddətinə azadlığın məhdudlaşdırılması cəzasına məhkum edilib. O, cəza müddətində Quba rayonunun inzibati ərazisini tərk edə bilməz.
Mənbə: Demokrat.аz
