Quba rayonunda ailədaxili münaqişə zəminində baş verən münaqişə ilə bağlı məhkəmə qərarı verilib.
Teleqraf.az-ın məlumatına görə, hadisə ötən ilin noyabrın 1-də rayonun kəndlərindən birində qeydə alınıb. 1999-cu il təvəllüdlü Təhminə (ad şərtidir) yaşadıqları evdə qayınanası Fatimə (ad şərtidir) ilə mübahisə edib.
Məişət zəminində yaranan mübahisə zamanı gəlin qayınanasına şillə vurub, daha sonra saçından tutaraq başını divara çırpıb.
Hadisə ilə bağlı Təhminəyə Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan olunub. Təqsirləndirilən şəxs məhkəmədə özünü təqsirli bildiyini deyib və hadisənin ailədaxili mübahisə zəminində baş verdiyini bildirib.
Quba Rayon Məhkəməsinin hökmü ilə Təhminə aylıq qazancının 10 faizi dövlət nəfinə tutulmaqla 6 ay müddətinə islah işləri cəzasına məhkum edilib.
