Quba rayonunda 29 yaşlı oğlan küçədə qadını təhqir etdiyi üçün məsuliyyətə cəlb edilib.
Teleqraf.az-ın məlumatına görə, hadisə çay evlərinin birinin qarşısında baş verib.
1997-ci il təvəllüdlü Sərxan Babayev (ad-soyad şərti verilib – red.) çay evinin qarşısında olan Aydan adlı qadına qarşı nalayiq ifadələr işlədib. Onun hərəkətlərini görən polis əməkdaşları ona yaxınlaşıb, özlərini təqdim ediblər.
Həmin şəxs barəsində qanuni tədbir görülməsi üçün Quba Rayon Polis Şöbəsinə gətirilib.
Babayevin barəsində İnzibati Xətalar Məcəlləsinin 150-cu (xırda xuliqanlıq) maddəsi ilə ittiham elan edilib.
İş üzrə izahat verən Babayev ittiham üzrə özünü təqsirli bilib. Bildirib ki, kafeyə gedib, oranı işlədən Aydan adlı xanımla aralarında söz mübahisəsi baş verib: "Sərxoş vəziyyətdə olmuşam, nə dediyimi bilməmişəm. Əslində nalayiq ifadələr işlətməyimi xatırlamıram".
Quba Rayon Məhkəməsinin qərarı ilə Babayev 70 manat məbləğində cərimə edilib. O, dərhal iclas zalından həbsdən azad edilib.
