Yeni il gecəsi Qubada baş verən hadisə məhkəmə ilə yekunlaşıb.
Demokrat.az-ın məlumatına görə, hadisə ötən ilin dekabrın 31-də Quba rayonunda yerləşən "Macəra" hotelində qeydə alınıb. Bakı sakini Kamil həyat yoldaşı Günəşlə (adlar şərtidir) birlikdə bayramı qeyd etmək üçün həmin ünvana gəlib.
Hotelin restoranında başlayan narazılıq sonradan otaqda davam edib. İddiaya əsasən, mübahisəyə səbəb kişinin tanımadığı azyaşlıya 50 manat pul verməsi və daha sonra həmin uşağın atasının onlara yaxınlaşması olub.
Təqsirləndirilən şəxs məhkəmədə bildirib ki, hadisə zamanı spirtli içki qəbul edib və həyat yoldaşı ilə aralarında mübahisə yaranıb. O, mübahisə zamanı qadını itələdiyini və ona zərbələr endirdiyini etiraf edib.
Zərərçəkmiş şəxsin sözlərinə görə, o, hadisədən sonra hoteldən ayrılaraq başqa ünvanda gecələyib və növbəti gün Bakıya qayıdıb. Daha sonra Daxili İşlər Nazirliyinin "102" qaynar xəttinə müraciət edərək hadisə barədə məlumat verib.
Quba Rayon Məhkəməsinin hökmü ilə Kamil aylıq qazancının 10 faizi dövlət nəfinə tutulmaqla 9 ay müddətinə islah işləri cəzasına məhkum edilib.
