Quba-Xaçmaz yolunda yol-nəqliyyat hadisəsi baş verib.
Shimal.News-un məlumatına görə, hadisə dünən (23.04.2026) axşam saat 20:30 radələrində yolun Timiryazev qəsəbəsi ərazisindən keçən hissəsində qeydə alınıb.
Quba istiqamətindən Xaçmaza doğru hərəkətdə olan "Nexia" markalı avtomobilin qarşısına qəfil iki at çıxıb.
Nəticədə heyvanlar avtomobilin üzərindən aşaraq yolun əks istiqamətinə keçib. Qəza zamanı nəqliyyat vasitəsində olan qadın sərnişin xəsarət alıb. Yaralı təcili tibbi yardım briqadası tərəfindən Quba Rayon Mərkəzi Xəstəxanasına çatdırılıb.
Məlumata görə, sürücü xəsarət almayıb. Avtomobilə ciddi ziyan dəyib. Hadisə zamanı atlardan biri yolda hərəkətsiz vəziyyətdə qalıb, digəri isə saxlanılaraq yol kənarında dirəyə bağlanıb.
Faktla bağlı araşdırma aparılır.
