Qəbələ rayonu sakininin Bakı şəhərində həyat yoldaşı ilə yaşadığı mübahisə cinayət işi ilə nəticələnib.
Demokrat.az-ın məlumatına görə, hadisə paytaxtın Nizami rayonu ərazisində baş verib. Qəbələ rayon sakini, 1992-ci il təvəllüdlü Tural (ad şərtidir) birgə qaldıqları evdə həyat yoldaşı Südabə ilə ailə-məişət zəminində mübahisə edib.
İddialara əsasən, mübahisə zamanı Tural qisas məqsədilə qadının sağ ayaq nahiyəsinə əl ilə zərbə endirərək ona xəsarət yetirib.
Faktla bağlı onun barəsində Azərbaycan Respublikasının Cinayət Məcəlləsinin 128-ci maddəsi ilə ittiham elan olunub.
Məhkəmə baxışı zamanı tərəflərin barışdığı məlum olub. Zərərçəkən şəxs şikayətini geri götürərək həyat yoldaşını bağışladığını bildirib.
Nizami Rayon Məhkəməsinin qərarına əsasən, Cinayət Məcəlləsinin 73.2-ci maddəsi tətbiq olunaraq təqsirləndirilən şəxs cinayət məsuliyyətindən azad edilib və iş üzrə icraata xitam verilib.
