Azərbaycanın tanınmış geoloqu, mərhum Həsən Çələbinin həyat yoldaşı Ekologiya və Təbii Sərvətlər Nazirliyini və nazirliyin tabeliyində fəaliyyət göstərən Geoloji Kəşfiyyat Agentliyini məhkəməyə verib.
Qaynarinfo.az-ın məlumatına görə, iddia Həsən Çələbiyə verilməsi nəzərdə tutulan pul mükafatı ilə bağlıdır. İddia ərizəsində bildirilir ki, həmin mükafat təqdim olunmayıb. Lakin cavabdeh qurumlar mükafatın verildiyini təsdiqləyən sənədləri məhkəməyə təqdim ediblər. Bu səbəbdən Bakı İnzibati Məhkəməsi iddianı təmin etməyib.
Həsən Çələbinin həyat yoldaşı qərardan apellyasiya şikayəti verib. Şikayətə Bakı Apellyasiya Məhkəməsində baxılıb və birinci instansiya məhkəməsinin qərarı qüvvədə saxlanılıb.
Həsən Çələbi 1947-ci il iyunun 10-da Qax rayonunun Sarıbaş kəndində anadan olub. O, 1967-1970-ci illərdə "Elektrotexsənaye" Elmi Tədqiqat İnstitutunda texnik və kiçik elmi işçi kimi çalışıb.
1974-1985-ci illərdə Azərbaycan Geologiya İdarəsinin Baş Qafqaz Geoloji Kəşfiyyat Ekspedisiyasında böyük texnik-geoloq, geoloq, böyük geoloq və axtarış partiyasının baş geoloqu vəzifələrində işləyib.
1985-2001-ci illərdə Azərbaycan Geologiya İdarəsində, daha sonra isə Azərbaycan Dövlət Geologiya və Mineral Ehtiyatlar Komitəsində böyük geoloq, şöbə rəisinin müavini, həmçinin Geologiya və Texniki-İstehsalat şöbələrinin rəisi vəzifələrində çalışıb.
2001-2006-cı illərdə Ekologiya və Təbii Sərvətlər Nazirliyinin Mərkəzi Aparatında, o cümlədən "İstehsalatın Təşkili və Planlaşdırılması İdarəsi"ndə baş mütəxəssis, Nazirliyin Milli Geoloji Kəşfiyyat Xidmətində isə baş geoloq olub.
2006-2021-ci illərdə Azərbaycanda qızıl hasilatı ilə məşğul olan Azerbaijan International Mining Company-də (AIMC) Geologiya Departamentinin baş geoloqu vəzifəsində çalışıb.
Həsən Çələbi 2021-ci ildə vəfat edib.
