Qax rayonunda qida təhlükəsizliyi ilə bağlı narahatlıq doğuran hadisə baş verib.
Rayon sakini Svetlana Mahsimova Qaxdakı un məmulatları mağazasından Gəncə Dəyirman MMC-yə məxsus "Mihriban" markalı un kisəsi alıb.
Kisəni evdə açarkən içərisindən yad cism çıxıb. Qadının iddiasına görə, bu, siçovulun quyruğu olub:
"Çörəyi evdə bişirdiyim üçün unu kisə ilə alıram. Qaxın un məmulatları dükanından 50 kiloqramlıq un kisəsi aldım. Kisənin ağzı bağlı idi. Açıb bir az götürdüm və ələdim. Növbəti dəfə götürəndə əlimə nəsə toxundu. Ürəkbulandırıcı göründüyü üçün salfetlə götürdüm. Diqqətlə baxanda şoka düşdüm. Siçovulun qurumuş quyruğu idi. İyrəndim, ürəyim bulandı və halsızlaşdım".
O bildirib ki, məsələ ilə bağlı məhsulu aldıqları mağazaya müraciət edib və aşkar olunan yad cism dükan sahibinə təqdim olunub.
Şikayətçi əlavə edib ki, un kisəsinin üzərində qeyd olunan nömrələr vasitəsilə zavodla da əlaqə saxlayıblar:
"Un kisəsinin üzərindəki nömrələrə zəng etdik. Zavoddan bildirdilər ki, belə bir halın baş verməsi mümkün deyil. Mən də bu vəziyyətə təəccübləndim. Axı neçə nəfər undan istifadə edir. Ona görə mediaya müraciət etdim ki, insanlar diqqətli olsunlar".
Məsələ ilə bağlı Gəncə Dəyirman MMC-nin direktoru Məhəmməd Ərsoy iddiaları qəbul etməyib:
"Bizdə belə bir halın baş verməsi mümkün deyil. Texnoloji proses buna imkan vermir. Mihriban unu bizim markamızdır və bizdə qablaşdırılır. Mən satıram Əliyə, Əli də Vəliyə… Vəlinin anbarında bulaşıbsa, mən nə edə bilərəm? Mən necə bilə bilərəm ki, o harada olub? Bəlkə şantajdır?! AQTA-ya müraciət olunubsa, gəlib yoxlasınlar, cavab verək".
AQTA-nın şöbə müdiri İlkin Kərimov isə məsələnin nəzarətə götürüldüyünü və araşdırılacağını bildirib.
Mənbə:BizimMedia
