Qaxda kişi qadın ofisianta iş təklif edən tanışını qaldırıb yerə çırpıb.
Shimal.News-un məlumatına görə, hadisə şəhərin Azərbaycan prospektində baş verib.
İş materiallarından görünür ki, təqsirləndirilən Eldar tanışı ilə onun kafesinə işləməyə gələn zərərçəkmiş Hikmətin qadın ofisianta iş təklif etməsi səbəbindən mübahisə edib. Eldar mübahisə zamanı Hikmətin baş nahiyəsinə bir dəfə yumruq vurub, daha sonra belindən tutaraq qaldırıb yerə çırpıb.
Hadisə nəticəsində zərərçəkmiş şəxs müxtəlif dərəcəli bədən xəsarətləri alıb. Faktla bağlı Cinayət Məcəlləsinin 128-ci maddəsi ilə cinayət işi açılıb və iş məhkəməyə göndərilib. Məhkəmə iclasında təqsirləndirilən şəxs özünü təqsirli bilib. O, zərərçəkmiş şəxslə barışdığını, qarşı tərəfin heç bir şikayətinin olmadığını bildirərək iş üzrə icraata xitam verilməsini xahiş edib.
Zərərçəkmiş şəxs də məhkəmədə təqsirləndirilən şəxslə barışdığını, ona qarşı hər hansı tələb və şikayətinin olmadığını təsdiqləyib.
Qax Rayon Məhkəməsinin qərarı ilə tərəflərin barışdığı nəzərə alınaraq təqsirləndirilən şəxs cinayət məsuliyyətindən azad edilib, cinayət işi üzrə icraata xitam verilib. Qeyd edək ki, adlar şərtidir.
Əsmər Sənani
