İsmayıllı rayonunda ər-arvad arasında baş verən mübahisə cinayətlə nəticələnib.
Demokrat.az-ın məlumatına görə, hadisə şəhərin M.Ə. Sabir küçəsində qeydə alınıb.
1965-ci il təvəllüdlü Əfqan evində həyat yoldaşı Zəminə (adlar şərtidir – red.) ilə mübahisə zamanı əsəblərinə hakim ola bilməyərək qadına əl qaldırıb. O, Zəminəyə həm yumruq zərbələri endirib, həm də taxta stulla xəsarət yetirib.
Nəticədə zərərçəkənin sağ əlinin üçüncü barmağı sınıb, sol gicgah-təpə nahiyəsində isə şişkinlik və digər xəsarətlər yaranıb.
Qadının polisə müraciətindən sonra faktla bağlı cinayət işi başlanıb. Lakin məhkəmə zamanı tərəflərin barışdığı məlum olub. Zərərçəkən şikayətini geri götürüb.
Məhkəmənin qərarı ilə təqsirləndirilən şəxs cinayət məsuliyyətindən azad edilib və iş üzrə icraata xitam verilib.
