İsmayıllıda övladlarını cinayət məsuliyyətindən yayındırmaq istəyən şəxs dələduzluqla üzləşib.
Qaynarinfo-nun əldə etdiyi məlumata görə, S.Səmədovun övladları Roman və Ruslan barəsində İsmayıllı Rayon Prokurorluğunda Cinayət Məcəlləsinin 179-cu (mənimsəmə və ya israf etmə) maddəsi ilə cinayət işi başlanıb.
Cinayət işinin istintaqı dövründə S.Səmədovun övladları Şəki Rayon Psixiatriya Xəstəxanasına yerləşdirilib. Bu zaman Quşencə kənd orta məktəbində sosial-pedaqoq vəzifəsində işləyən A.İ. S.Səmədova övladlarının anlaqsız olmaları barədə rəy ala biləcəyini və bununla da onların cinayət məsuliyyətindən azad ediləcəyini bildirib. Lakin bunun müqabilində qarşı tərəfdən pul tələb edib.
Valideyn hissə-hissə olmaqla ona ümumilikdə 20 700 manat pul verib. Lakin təqsirləndirilən şəxs verdiyi vədi yerinə yetirmədiyindən, zərərçəkən hüquq-mühafizə orqanlarına müraciət edib. Nəticədə şəxs saxlanılıb və barəsində Cinayət Məcəlləsinin 178.2.4-cü (dələduzluq - xeyli miqdarda ziyan vurmaqla törədildikdə) maddəsi ilə ittiham irəli sürülüb. Həmçinin barəsində polisin nəzarəti altına vermə qətimkan tədbiri seçilib.
Cinayət işinə İsmayıllı Rayon Məhkəməsində hakim İlqar Hüseynovun sədrliyi ilə baxılıb. Məhkəmə zamanı təqsirləndirilən verilmiş ittiham üzrə özünü qismən təqsirli bilib.
Məhkəmənin hökmü ilə təqsirləndirilən şəxsə 2 il 6 ay müddətinə azadlığın məhdudlaşdırılması cəzası təyin edilib. Onun şübhəli şəxs qismində saxlanıldığı 2 gün müddət 1 günə 2 gün hesablanmaqla təyin edilmiş cəzadan çıxılıb və üzərində qəti olaraq 2 il 5 ay 26 gün müddətinə azadlığın məhdudlaşdırılması cəzası saxlanılıb.
