Fevralın 11-də saat 22:30 radələrində Bakı–Quba ödənişli avtomobil yolunun 56-cı kilometrliyində, Xızı rayonunun Yaşma kəndi ərazisindən keçən hissəsində ağır yol-nəqliyyat hadisəsi baş verib.
Shimal.News xəbər verir ki, bu barədə Daxili İşlər Nazirliyinin vətəndaşlara müraciətində deyilir.
Bildirilir ki, kimliyi bəlli olmayan sürücü idarə etdiyi naməlum markalı avtomobillə Quba istiqamətində hərəkətdə olarkən yolu keçən təqribən 60–65 yaşlarında kişini vurub. Nəticədə piyada aldığı xəsarətlərdən hadisə yerində ölüb.
"Aparılan araşdırmalar zamanı mərhumun üzərində şəxsiyyətini təsdiq edən hər hansı sənəd aşkar edilməyib. Onun sol əlinin üzərində kiril əlifbası ilə "Süleyman" sözü yazılmış döymə olduğu müəyyən edilib. Həmin şəxsin görüntüləri ərazidəki kameralarla da qeydə alınıb.
Mərhumun şəxsiyyətinin müəyyənləşdirilməsi istiqamətində tədbirlər davam etdirilir.
Hadisə ilə bağlı məlumatı olan, yaxud mərhumu tanıyan şəxslərdən xahiş olunur ki, 023-31-50-131, +994 55 210 73 73 şəhər və mobil telefon nömrələrinə, həmçinin 102 xidmətinə məlumat versinlər", - qurumdan əlavə olunub.
