Moskvanın ən böyük ticarət mərkəzlərindən biri olan "Sadovod"a pilotsuz uçuş aparatının (PUA) qalıqlarının düşməsi nəticəsində Şəki sakinləri xəsarət alıblar.
Shimal.News xəbər verir ki, İslam Süleymanov və Elnur Nəbiyev 36 saylı xəstəxanaya yerləşdiriliblər. Məlumata görə, yaralılardan biri artıq ambulator müalicə üçün evə buraxılıb.
Hadisə dünən səhər Moskva və onun ətrafına edilən PUA hücumu zamanı baş verib. Rusiya mediasının məlumatına əsasən, hava hücumundan müdafiə sistemlərinin fəaliyyəti nəticəsində PUA qalıqları "Sadovod" ticarət mərkəzinin ərazisinə düşərək yanğına səbəb olub.
Qeyd edək ki, mediada yayılan məlumatlara görə, "Sadovod" ticarət mərkəzi əslən Quba rayonundan olan iş adamları Qod Nisanov və Zarah İliyevin, eləcə də İlham Rəhimovun biznes maraqları ilə əlaqələndirilir.
