Bakı Ağır Cinayətlər Məhkəməsində fəhlə yoldaşını qətlə yetirməkdə təqsirləndirilən Fazil Feyzullayev və ona kömək etməkdə ittiham olunan Ülvi Abbasovun məhkəmə prosesi davam edib.
Oxu.az-ın məlumatına görə, məhkəmə iclasında şahid qismində Babək Güləliyev ifadə verib.
Şahid bildirib ki, hadisə baş verən vaxt sürət həddini aşan sürücünü saxlayaraq ona xəbərdarlıq edib. Sürücü isə avtomobildə zibil olduğunu və onu atmağa tələsdiyini deyərək üzr istəyib.
Növbəti məhkəmə iclası isə mayın 19-na təyin olunub.
Qeyd edək ki, hadisə ötən ilin avqust ayında paytaxtın Nəsimi rayonu ərazisində baş verib.
İttihama görə, 1977-ci il təvəllüdlü Fazil Feyzullayev kirayədə yaşadığı evdə fəhlə yoldaşı, Tərtər sakini İsgəndər Əliyevi küt alətlə qətlə yetirib.
Daha sonra o, meyiti avtomobillə Ağsu dolaylarına apararaq hissələrə ayırıb. Meyitin bir hissəsi dərəyə, digər hissələri isə rayon ərazisində yerləşən Cavanşir gölünə atılıb.
Polisin keçirdiyi əməliyyat-axtarış tədbirləri nəticəsində cinayətin üstü açılıb, Fazil Feyzullayev və Ülvi Abbasov saxlanılıblar.
Təqsirləndirilən şəxslərə qarşı bir neçə ağır maddə, o cümlədən adam öldürmə, quldurluq və meyit üzərində təhqiredici hərəkətlə bağlı ittihamlar irəli sürülüb.
