Şəkidə sərxoş kişi gecə saat 3-də qonşusunun evinə girib.
Shimal.News-un məlumatına görə, hadisə rayonun Baş Şabalıdlı kəndində qeydə alınıb.
Belə ki, 1994-cü il təvəllüdlü kənd sakini Sübhan bir kafedə dostları ilə birlikdə yemək yeyib, spirtli içki qəbul edib. O, dostlarının yanından ayrıldıqdan sonra sərxoş halda evlərindən 150 metr uzaqlıqda yerləşən qonşusu Xalidənin evinə girib. Həyət darvazasının bağlı olduğunu görən Sübhan daş hasardan keçərək həyətə, daha sonra evin qapısını sındıraraq mənzilə daxil olub. Hadisə vaxtı Xalidə kiçik oğlu ilə birlikdə evdə yatılı vəziyyətdə olub. Həmin an qadın və oğlu yuxudan oyanıb və qonşuluqda yaşayan Sübhanı tanıyıblar. Zərərçəkmişlər qışqırdığı üçün Sübhan oradan uzaqlaşıb, yaşadığı evə gedərək yatıb.
Xalidənin şikayəti əsasında Sübhan məsuliyyətə cəlb edilərək, Cinayət Məcəlləsinin 157-ci (Mənzil toxunulmazlığının pozulması) maddəsi ilə təqsirli bilinib.
O, məhkəmədə ifadəsində özünü təqsirliyi bilmədiyini, hadisəni sərxoş halda törətdiyini qeyd edib. Şəki Rayon Məhkəməsinin hökmü ilə ona 6 ay islah işləri cəzası verilib. Qeyd edək ki, zərərçəkmişin adı şərti verilib.
Fidan İlqar
