İsmayıllının Bizlan kəndində baş verən torpaq sürüşməsi nəticəsində yaşayış evi ciddi ziyan görüb.
İlkin məlumata görə, təbii hadisə nəticəsində Müslüm Xasiyevə məxsus ikimərtəbəli yaşayış evinin bir hissəsi çökərək yararsız vəziyyətə düşüb. Bildirilir ki, həmin evdə üç ailə yaşayır.
Hadisə yerinə aidiyyəti qurumların nümayəndələri cəlb olunub və ilkin araşdırmalar aparılıb.
Məsələ ilə bağlı İsmayıllı Rayon İcra Hakimiyyəti bildirib ki, iyulun 10-da baş verən hadisə ilə əlaqədar Rayon Fövqəladə Hallar Komissiyası tərəfindən operativ araşdırma aparılıb, müvafiq sənədlər hazırlanaraq Nazirlər Kabinetinə təqdim edilib.
Qeyd olunub ki, baş vermiş sürüşmə barədə Fövqəladə Hallar Nazirliyi və Ekologiya və Təbii Sərvətlər Nazirliyi də məlumatlandırılıb. Yaxın günlərdə yaradılacaq xüsusi komissiya əraziyə baxış keçirəcək, torpaq sürüşməsinin miqyası və dəymiş ziyanın həcmi qiymətləndirilərək müvafiq qərar qəbul olunacaq.
Rayon İcra Hakimiyyəti bildirir ki, vəziyyət nəzarətdə saxlanılır və fəsadların aradan qaldırılması istiqamətində zəruri tədbirlər görülür.
Mənbə: Report.az
