İsmayıllı rayonunda 35 yaşlı qadın ailə münaqişəsi zəminində həyat yoldaşına xəsarət yetirib.
Demokrat.az-ın məlumatına görə, hadisə 2024-cü il oktyabrın 27-də İsmayıllı şəhərində baş verib. 1991-ci il təvəllüdlü Təhminə (adlar şərtidir) səhər saat 8 radələrində yaşadıqları evdə əri Elməddinlə mübahisə edib. Mübahisə zamanı Elməddin qadına yumruq və təpiklə zərbələr endirib. Otaqdan çıxmaq istəyən zaman isə Təhminə stolun üzərində olan bıçağı götürərək ərini kürəyindən bir dəfə vurub.
Faktla bağlı Təhminənin barəsində Cinayət Məcəlləsinin 128-ci maddəsi (qəsdən sağlamlığa zərər vurma) ilə ittiham irəli sürülüb.
Məhkəmədə ifadə verən Təhminə bildirib ki, Elməddinlə 2015-ci ildə ailə qurublar, iki azyaşlı övladları var. Onun sözlərinə görə, ailə münasibətləri uzun müddət normal olmayıb, tez-tez münaqişələr baş verib. Hadisədən bir gün əvvəl əri içkili vəziyyətdə evə gəlib, ertəsi gün isə mobil telefon üstündə mübahisə yaranıb və fiziki zorakılıq tətbiq edilib.
Təhminə əməlindən peşman olduğunu, bıçağı yuyaraq həyətdə gizlətdiyini, daha sonra isə polisə təqdim etdiyini bildirib.
Cinayət işinə İsmayıllı Rayon Məhkəməsində baxılıb. Məlum olub ki, tərəflər barışıq əldə edib və zərərçəkmiş şikayətçi olmayıb.
Məhkəmənin hökmü ilə Cinayət Məcəlləsinin 73.2-ci maddəsinə əsasən Təhminə cinayət məsuliyyətindən azad edilib və iş üzrə icraata xitam verilib.
