Zaqatala rayonunda ər arvadına xəsarət yetirib.
Demokrat.az-ın məlumatına görə, 1982-ci il təvəllüdlü Bəhlul həyat yoldaşı Aynurə (adlar şərtidir) ilə mübahisə zamanı onun baş nahiyəsinə bir neçə dəfə yumruqla zərbə endirib.
Məhkəmədə ifadə verən təqsirləndirilən şəxs özünü təqsirli bilib. O, bildirib ki, son bir ildə həyat yoldaşı ona xəbər vermədən tez-tez rəfiqəsi Ləmanla Zaqatala şəhərinə gedib, evə isə gec saatlarda qayıdıb.
Bəhlul həyat yoldaşından bu görüşlərə son qoymasını və evdən xəbəri olmadan çıxmamasını dəfələrlə tələb etsə də, Aynurə buna məhəl qoymayıb.
Kişinin sözlərinə görə, həmin mübahisə günü Aynurə ona odun atıb. Bundan əsəbiləşən Bəhlul isə qadına hücum edib.
Aynurə onun əlindən çıxaraq həyətə qaçıb və hadisə bununla yekunlaşıb.
Zaqatala Rayon Məhkəməsinin hökmü ilə kişi barəsində olan cinayət təqibinə xitam verilib.
Məhkəmə "Konstitusiya və Suverenlik İli" münasibətilə elan olunmuş amnistiya aktını tətbiq edərək onu cinayət məsuliyyətindən azad edib.
