Balakən rayonunda 39 yaşlı kişi arvadına və bacanağına xəsarət yetirib.
Demokrat.az-ın məlumatına görə, hadisə ötən il noyabrın 30-da rayonun kəndlərindən birində qeydə alınıb.
1987-ci il təvəllüdlü Azər arvadı Səmayə ilə bacanağı Eldənizin (adlar şərtidir) gizli görüşəcəyindən şübhələnib. Bildirilir ki, Eldəniz "WhatsApp" vasitəsilə qadına həyətə düşməsi ilə bağlı mesaj yazıb.
Bundan xəbər tutan kişi onları izləyərək görüşəcəkləri anı gözləyib. Qadın həyətə düşən kimi Azər qısqanclıq zəminində mətbəx bıçağı ilə həm arvadına, həm də bacanağına xəsarət yetirib.
Faktla bağlı onun barəsində Cinayət Məcəlləsinin 128-ci maddəsi ilə cinayət işi başlanıb.
Lakin Balakən Rayon Məhkəməsinin qərarı ilə "Konstitusiya və Suverenlik ili" ilə bağlı tətbiq edilən amnistiya aktına əsasən, cinayət təqibinə xitam verilib və Azər məsuliyyətdən azad olunub.
