Bakı Ağır Cinayətlər Məhkəməsində dələduzluqda təqsirləndirilən İsmayıllı rayon sakininə hökm oxunub.
Əvvəllər də dələduzluq əməlinə görə məhkum edilmiş 1993-cü il təvəllüdlü Coşqun Rzayev (soyad şərtidir) Cinayət Məcəlləsinin 178.3.2-ci maddəsi üzrə təqsirli bilinib.
Məlum olub ki, 2022-ci ildə dələduzluğa görə məhkum edilən şəxs cəzasının bir hissəsini çəkdikdən sonra azadlığa buraxılıb. Lakin o, oxşar əməllər törətməkdə davam edib.
Belə ki, paytaxtda tanış olduğu Nazilə adlı qadının həbsdə olan oğlunu azadlığa buraxdıracağını yalandan vəd edərək 45 min manata yaxın pul alıb. Coşqun həmin qadının Rusiya-Ukrayna müharibəsində iştirak edən qardaşını Azərbaycana gətirəcəyinə də inandıraraq 7 min manat əlavə pul alıb.
Qadın aldadıldığını başa düşdükdən sonra polisə müraciət edib və Coşqun saxlanılıb.
Zərərçəkmiş şəxs bildirib ki, onu Coşqunla Taleh adlı hərbçi tanış edib:
"Mənə dedilər ki, bu adamın əli hər yerə girir, sənə kömək edəcək. Metronun "Elmlər Akademiyası" stansiyasının yaxınlığında onunla görüşəndə iki ofisə daxil oldu, hamı onunla görüşürdü, mən də inandım ki, mötəbər adamdır".
Coşqun Rzayev ifadəsində dələduzluq əməli törətdiyini etiraf edib. Aldığı pulları geri qaytarmadığını, lakin gələcəkdə qaytara biləcəyini bildirib.
Məhkəmənin hökmü ilə 33 yaşlı şəxsə 7 il həbs cəzası verilib.
Mənbə: Qafqazinfo.аz
