Sumqayıtdan Qubaya gedib bacısını öldürməyə cəhddə təsirləndiriləndirilən Murad Məhərrəmovun cinayət işi üzrə məhkəmə prosesi başa çatıb.
Oxu.az-ın məlumatına görə, məhkəmənin hökmü ilə o, 7 il 10 ay 15 gün müddətinə azadlıqdan məhrum edilib.
İttihama görə, hadisə ötən il sentyabrın 23-də Quba rayonunun Xucbala kəndində baş verib.
Bildirilir ki, kənd sakini Elməddin Lalayev dörd dəfə ailə qurub boşandıqdan sonra Sumqayıt şəhər sakini, iki uşaq anası Şamama Kərimova ilə "TikTok" sosial şəbəkəsində tanış olub.
Ailəli olan Ş.Kərimova həyat yoldaşı ilə münasibətlərindən narazı olduğunu bildirərək evdən qaçmaq istədiyini deyib. Bir müddət sonra tərəflər görüşərək Xucbala kəndinə gediblər.
Qadının evə qayıtmadığını görən həyat yoldaşı bu barədə onun qardaşı Murad Məhərrəmova məlumat verib. Bacısının yerini öyrənən Murad Məhərrəmov bıçaq götürərək Quba rayonuna yollanıb.
Kənd ərazisində bacısı ilə qarşılaşan şəxs onunla mübahisə edib və bıçaqla hücum edərək çoxsaylı zərbələr endirib. Daha sonra hadisə yerindən qaçıb.
Ağır yaralanan qadın xəstəxanaya çatdırılıb, əməliyyat olunaraq həyatı xilas edilib.
Hadisəni törədən şəxs isə polis əməkdaşları tərəfindən saxlanılıb və barəsində məhkəmə hökmü çıxarılıb.
