Sosial şəbəkələrdə vətəndaşlara Dövlət Sosial Müdafiə Fondu tərəfindən 1000 manat ödəniləcəyi ilə bağlı yalan məlumat yayan şəxs inzibati qaydada həbs olunub.
1995-ci il təvəllüdlü, Balakən rayon sakini A. İbrahimov barəsində 9 sutka inzibati həbs qərarı verilib.
Məlumata görə, o, "TikTok" platformasında 1932–2017-ci illər arasında doğulmuş şəxslərə 1000 manat ödəniş ediləcəyi barədə saxta videonu öz səhifəsində paylaşıb. Paylaşım qısa müddətdə geniş yayılıb, minlərlə bəyənmə və yüzlərlə şərh toplayıb.
A. İbrahimov bildirib ki, videonu başqa səhifədən götürərək yayıb. Məhkəmədə əməlindən peşman olduğunu deyib.
Faktla bağlı o, inzibati məsuliyyətə cəlb olunub. Oxşar paylaşımların digər səhifələrdə də yayıldığı bildirilir.
