Qaraməryəm-İsmayıllı-Şəki avtomobil yolunun Şəkinin Aşağı Küngüt kəndi ərazisindən keçən hissəsində yol-nəqliyyat hadisəsi qeydə alınıb.
Unikal.az-ın məlumatına görə, "Mercedes" markalı avtomobil idarəetmədən çıxaraq çökəkliyə aşıb. Nəticədə "Mercedes"in sürücüsü 26 yaşlı Elmar Musazadə xəsarət alıb.
Şəki Rayon Mərkəzi Xəstəxanasından bildirilib ki, şəxsə başın açıq yarası diaqnozu qoyularaq zəruri tibbi xidmətlər göstərilib. Müalicəsi cərrahiyyə şöbəsində davam etdirilir.
Eyni zamanda, şəhərin Sabit Rəhman küçəsində "Nissan" və VAZ-21015 markalı iki minik avtomobil toqquşub.
Qəza nəticəsində müxtəlif dərəcəli bədən xəsarətləri alan "Nissan"ın sürücüsü 71 yaşlı Asif Paşayev Rayon Mərkəzi Xəstəxanasına çatdırılıb. Pasiyentə başın çoxsaylı açıq yaraları, sol ayağın yerdəyişən sınığı diaqnozu qoyulub və zəruri tibbi xidmətlər göstərilib. Vəziyyəti orta ağır qiymətləndirilən Asif Paşayevin müalicəsi müvafiq şöbədə davam etdirilir.
Hər iki yol-nəqliyyat hadisəsi ilə bağlı araşdırma aparılır.
