Bakı–Quba–Rusiya Federasiyası dövlət sərhədi ödənişli avtomobil yolunda yanacaqdaşıyan avtomobilin iştirakı ilə yol-nəqliyyat hadisəsi baş verib.
Shimal.News xəbər verir ki, Fövqəladə Hallar Nazirliyinin (FHN) "112" qaynar xəttinə yolun 60-cı kilometrliyində yanacaqdaşıyan avtomobildə yanğın baş verməsi barədə məlumat daxil olub.
Hadisə yerinə dərhal FHN-in Dövlət Yanğından Mühafizə Xidmətinin Sumqayıt Şəhər Yanğından Mühafizə İdarəsinin qüvvələri cəlb olunub.
Əməliyyat şəraiti qiymətləndirilərkən məlum olub ki, "MAN" markalı yanacaqdaşıyan avtomobil idarəetməni itirərək yol kənarına aşıb və nəticədə yanğın baş verib.
Yanğınsöndürənlərin operativ müdaxiləsi nəticəsində alovun avtomobilin kabinəsinə və ətraf ərazilərə yayılmasının qarşısı alınıb. Yanğın qısa müddətdə söndürülüb.
Hadisə nəticəsində avtomobilin qoşqusunda olan yanacaq çəni və ətrafa dağılmış yanacaq 500 kvadratmetr sahədə yanıb.
Qəza zamanı xəsarət alan olmayıb. Avtomobilin kabinəsi və ətraf ərazi yanğından mühafizə edilib.
Faktla bağlı aidiyyəti qurumlar tərəfindən araşdırma aparılır.
