Bu gün AMEA-nın Şəki Regional Elmi Mərkəzinin direktoru, fizika üzrə fəlsəfə doktoru, dosent Yusif Hacıbala oğlu Şükürlü vəfat edib.
Shimal.News xəbər verir ki, Yusif Şükürlü 2014-cü il 16 oktyabr tarixində AMEA Rəyasət Heyətinin qərarı ilə Şəki Regional Elmi Mərkəzinə direktor təyin olunub və bu vəzifədə çalışdığı müddətdə mərkəzin elmi və təşkilati inkişafına mühüm töhfələr verib.
O, 1975-ci ildə Azərbaycan SSR Elmlər Akademiyasının Fizika İnstitutunun aspiranturasına daxil olub, eyni zamanda Şəki Regional Elmi Mərkəzdə əmək fəaliyyətinə laborant kimi başlayıb.
1976-cı ildən kiçik elmi işçi kimi fəaliyyət göstərib, 1977-ci ildə AMEA-nın Radiasiya Problemləri İnstitutuna köçürülərək 1987-ci ilə qədər burada kiçik elmi işçi vəzifəsində çalışıb, 1987–1990-cı illərdə baş elmi işçi olub.
Yusif Şükürlü "Fibroinin molekulyar və ifratmolekulyar quruluşuna selenin təsiri" mövzusunda namizədlik dissertasiyası müdafiə edib.
1990-cı ildən etibarən Şəki Regional Elmi Mərkəzdə fəaliyyətini davam etdirən Yusif Şükürlü uzun illər "Biofizika" laboratoriyasına (indiki Ekoloji biofizika şöbəsi) rəhbərlik edib, 2025-ci ilə qədər bu sahədə səmərəli elmi-tədqiqat işi aparıb.
Alim 95 elmi əsərin, o cümlədən beynəlxalq elmi bazalarda indeksləşən jurnallarda dərc olunmuş 27 məqalənin müəllifidir. O, 2 monoqrafiya, 1 dərs vəsaiti və 2 bədii kitabın müəllifi, 1 monoqrafiyanın isə həmmüəllifi olmuşdur. Yusif Şükürlü, həmçinin 9 şəhadətnamə və 5 patentin müəllifi idi.
