Quba rayonunun Elbir (Vladimirovka) kəndində fəaliyyət göstərən "Ran Fruit" şirkəti ilə bağlı növbəti dəfə əməkhaqqı şikayətləri səsləndirilib.
Shimal.News-a müraciət edən müəssisə əməkdaşlarının sözlərinə görə, 250-dən çox işçi artıq üç aydır ki, əməkhaqqını ala bilmir. İddia olunur ki, maaşlarının ödənilməsini tələb edən bəzi işçilər hədələrlə üzləşir, bəziləri isə işdən uzaqlaşdırılır.
Şikayətçilər bildirirlər ki, əməkhaqlarının aylardır ödənilməməsi onların sosial vəziyyətinə ciddi təsir göstərib.
"İşləyirik, amma maaşımızı ala bilmirik. Kreditlərimizi ödəyə bilmədiyimiz üçün adımıza gecikmələr düşür, əlavə faizlər hesablanır. Ailəmizi dolandırmaq üçün borc almağa məcbur oluruq. Öz haqqımız olan əməkhaqqını tələb etdikdə isə müxtəlif təhdidlərlə qarşılaşırıq", – deyə müraciətdə bildirilir.
Əməkdaşların iddialarına görə, müəssisədə işçilərin faktiki aldıqları əməkhaqqı ilə rəsmi sənədlərdə göstərilən məbləğ arasında da fərq var. Məsələn, işçi 700 manat əməkhaqqı alsa da, bunun təxminən yarısı əməkhaqqı kartına köçürülür və rəsmi sənədlərdə də həmin məbləğ göstərilir. Onlar bu və digər məsələlərin araşdırılması üçün Dövlət Əmək Müfəttişliyi Xidmətinə müraciət etdiklərini və izahat vermək məqsədilə quruma dəvət olunduqlarını da bildiriblər.
İşçilərin sözlərinə görə, müəssisədə uzun illər çalışan əməkdaşlar da var və onlar illərlə çalışdıqları şirkətdə əməklərinin qarşılığını vaxtında ala bilməməkdən narahat olduqlarını deyirlər. Şikayətçilər problemin qısa müddətdə həllini və əməkhaqlarının ödənilməsini tələb edirlər.
Məsələ ilə bağlı "Ran Fruit" şirkətinin rəhbəri Xaliq Abbasovla əlaqə saxladıq. O, əməkhaqlarının ödənilməməsi ilə bağlı səsləndirilən iddialara münasibət bildirərək yalnız "Yalandır" deməklə kifayətləndi.
Qeyd edək ki, Shimal.News bu ilin yanvar ayında da həmin müəssisədə əməkhaqlarının gecikdirilməsi ilə bağlı işçilərin şikayətlərini işıqlandırıb.
