Bu gün şimal bölgəsindən olan şəhidlərimiz - Amrid Yunusov və Nurlan Əhmədlinin doğum günüdür.
Amrid Zaur oğlu Yunusov 1995-ci il oktyabrın 12-də Qusar rayonunun Əniq kəndində anadan olub.
Azərbaycan Ordusunun çavuşu olan Amrid Yunusov 2020-ci il sentyabrın 27-də başlayan Vətən müharibəsi zamanı Hadrut qəsəbəsinin və Füzulinin azadlığı uğrunda gedən döyüşlərdə iştirak edib. O, oktyabrın 28-də Füzuli istiqamətində gedən döyüşlərdə şəhid olub. Qusar rayonunun Əniq kəndində dəfn edilib.
Amrid Yunusov ölümündən sonra "Vətən uğrunda", "Xocavəndin azad olunmasına görə", "Cəbrayılın azad olunmasına görə", "Füzulinin azad olunmasına görə" və "Cəsur döyüşçü" medalları, həmçinin 3-cü dərəcəli "Vətənə xidmətə görə" ordeni ilə təltif edilib.
Nurlan Rəhim oğlu Əhmədli 1996-cı il oktyabrın 12-də Oğuz rayonunun Xaçmaz kəndində anadan olub.
O, 2003-cü ildə M. F. Axundov adına 1 nömrəli tam orta məktəbə daxil olub, 2014-cü ildə həmin məktəbi bitirib. 2014-2018-ci illərdə Azərbaycan Texniki Universitetində informasiya və telekommunikasiya texnologiyaları fakültəsinin elektronika, telekommunikasiya və radiotexnika mühəndisliyi ixtisası üzrə bakalavr təhsili alıb.
Nurlan Əhmədli 2019-cu ilin yanvarında müddətli həqiqi hərbi xidmətə çağırılıb və 2020-ci ilin iyulunda xidmətini başa vurub.
O, 2020-ci il sentyabrın 27-də başlayan Vətən müharibəsi zamanı Füzuli istiqamətində gedən döyüşlərdə iştirak edib. Nurlan Əhmədli oktyabrın 27-də şəhid olub. Oğuz rayonunun Xaçmaz kəndindəki Şəhidlər xiyabanında dəfn edilib.
Nurlan Əhmədli ölümündən sonra "Vətən uğrunda" və "Füzulinin azad olunmasına görə" medalları, "Döyüşdə fərqlənməyə görə" medalları və 3-cü dərəcəli "Vətənə xidmətə görə" ordeni ilə təltif edilib.
