Qəbələyə gələn turistləri yol kənarına səpələnmiş məişət tullantıları qarşılayır. Bu məsələ dəfələrlə gündəmə gətirilsə də, problem yenə həllini tapmayıb.
Shimal.News xəbər verir ki, Qaraməryəm–İsmayıllı–Şəki magistral yolunun Nic qəsəbəsi ərazisindən keçən hissəsində tullantılar yenidən qalaqlanıb.
Xüsusilə Oğuzdan Qəbələyə giriş hissəsində, yol nişanının arxasına atılan zibillər ətrafa səpələnərək ərazini antisanitariya mənbəyinə çevirib.
Ən narahatedici məqam isə problemin yeni olmamasıdır. Shimal.News daha əvvəl də həmin ərazidəki zibilliklə bağlı məlumat yayıb. Ancaq görünən odur ki, əvvəlki xəbərdarlıqlar vəziyyəti dəyişməyib, tullantılar yenidən ətrafa yayılıb.
Vətəndaşlarda suallar yaranır: "Görəsən, aidiyyəti qurumlar bu mənzərəni görmür, yoxsa görüb tədbir görməyi lazım bilmirlər? Magistral yolun kənarının təmiz saxlanılması, tullantıların vaxtında daşınması və ərazinin zibilliyə çevrilməsinin qarşısının alınması kimin məsuliyyətidir?"
Problemi yalnız növbəti xəbərdən sonra təmizləməklə deyil, zibillənmənin qarşısını alan real və davamlı tədbirlərlə həll etmək lazımdır.
