Xaçmaz rayonunda qəhvəyi mərmər bağacığının sayı son günlər yenidən artıb. Zərərvericilər Nabran və Yalama zonalarındakı yaşayış məntəqələrində, o cümlədən İstisu qəsəbəsi, Köhnə Xudat və Palıdlı kəndlərindəki məktəblərdə müşahidə olunur.
Kütləvi yayılan zərərvericilər evlərə, məktəblərə və meyvə bağlarına ziyan vurur. Azərbaycan Qida Təhlükəsizliyi Agentliyi (AQTA) qışlama dövründə həşəratlarla mübarizənin daha effektiv olduğunu bildirir.
Mövzu ilə bağlı AQTA-nın Bitki sağlamlığı və bioloji təhlükəsizlik şöbəsinin müdiri, respublikanın baş dövlət fitosanitar müfəttişi Elmar Allahverdiyev açıqlamasında bildirib ki, qəhvəyi mərmər bağacığı ölkədə karantin tətbiq edilən zərərli orqanizmlər sırasındadır.
Onun sözlərinə görə, zərərverici 300-dən çox bitki növü ilə qidalanır və məhsuldarlığın əhəmiyyətli dərəcədə azalmasına səbəb olur. Agentlik rəsmisi qeyd edib ki, ölkənin şimal-qərb rayonlarında zərərvericinin yayılması ilə bağlı gündəlik monitorinqlər aparılır, onun toplana biləcəyi ərazilərdə feromon tələlər quraşdırılır və qeydiyyat işləri görülür.
Elmar Allahverdiyev bildirib ki, Zaqatala-Balakən bölgəsində azalma müşahidə olunsa da, mövsümlə əlaqədar Quba-Xaçmaz bölgəsində mərmər bağacığının sayında artım qeydə alınır.
"Bağacıqlar qışlama dövrünə qədəm qoyur. Bu dövrdə onunla mübarizə aparmaq daha effektiv və asandır. Belə ki, evlərin damlarında, xüsusilə köhnə təsərrüfat tikililərində, çardaqlarda, qapı-pəncərə boşluqlarında zərərvericilər toplanır. Onların toplanaraq mexaniki üsulla məhv edilməsi daha effektiv və sürətli həyata keçirilə bilər".
AQTA rəsmisi əlavə edib ki, Agentliyin koordinasiyası ilə müxtəlif dövlət qurumlarının iştirakı ilə mübarizə tədbirləri həyata keçirilir. O, əhalini də prosesdə fəal iştirak etməyə çağırıb.
"Bu prosesdə əhali də yaxından iştirak etməlidir. Xüsusilə qışlama dövründə zərərvericinin toplanaraq mexaniki üsulla məhv edilməsində əhali də kifayət qədər dəstək göstərməlidir".
Mənbə: Bizim.Media
