Bu gün şimal bölgəsindən olan şəhidlərimiz - Vaqif Abdullayev və Elşən Dəmirlinin doğum günüdür.
Vaqif Rəşid oğlu Abdullayev 1996-cı il oktyabrın 15-də Ağsu rayonunun Hacıqədirli kəndində anadan olub.
Azərbaycan Ordusunun əsgəri olan Vaqif Abdullayev 2020-ci il sentyabrın 27-də başlayan Vətən müharibəsində iştirak edib. O, Laçının azadlığı uğrunda gedən döyüşlərdə vuruşub və noyabrın 6-da şəhid olub. Ağsu rayonunda dəfn edilib.
Vaqif Abdullayev ölümündən sonra "Vətən uğrunda", "Laçının azad olunmasına görə" və "Suqovuşanın azad olunmasına görə" medalları, həmçinin 3-cü dərəcəli "Vətənə xidmətə görə" ordeni ilə təltif edilib.
Elşən Gündüz oğlu Dəmirli 1998-ci il oktyabrın 15-də Qəbələ rayonunun Nic qəsəbəsində dünyaya göz açıb. Orta təhsilini Nic qəsəbə 3 saylı tam orta məktəbində alıb. 2016-cı ilin oktyabrında müddətli həqiqi hərbi xidmətə yollanıb. 2020-ci ildə müddətdən artıq həqiqi hərbi xidmət qulluqçusu kimi hərbi xidmətini davam etdirib. Mingəçevirdə yerləşən "N" saylı hərbi hissədə xidmət edib.
Azərbaycan Ordusunun əsgəri olan Elşən Dəmirli 2020-ci il sentyabrın 27-də başlayan Vətən müharibəsində iştirak edib. Ağdamın azadlığı uğrunda gedən döyüşlərdə vuruşub. O, sentyabrın 28-də Ağdam istiqamətində döyüş tapşırığını yerinə yetirərkən şəhid olub.
Elşən Dəmirli ölümündən sonra "Vətən uğrunda" və "Cəsur döyüşçü" medalları, "Suqovuşanın azad olunmasına görə" medalı, həmçinin 3-cü dərəcəli "Vətənə xidmətə görə" ordeni ilə təltif edilib.
