Şabran şəhərində Samur-Abşeron kanalın ətrafına məişət tullantılarının atılması və su hövzəsinin baxımsız qalması narahatlıq doğurur.
Shimal.News xəbər verir ki, yaşayış evlərinin yaxınlığından keçən kanalın bəzi hissələrində plastik qablar, polietilen torbalar, avtomobil təkərləri və digər məişət tullantıları yığılıb.
Yeni su infrastrukturu istifadəyə verildikdən sonra Samur çayından Taxtakörpü su anbarına suyun nəqli üçün istifadə olunan köhnə kanal hazırda əsasən suvarma məqsədilə istifadə edilir. Buna baxmayaraq, Şabran şəhərinin yaşayış evlərinin sıx yerləşdiyi ərazilərdə kanalın vəziyyəti qənaətbəxş deyil.
Ərazidəki bəzi hissələrin uzun müddətdir lildən və qamışlıqlardan təmizlənmədiyi də müşahidə olunur. Tullantıların atıldığı yerlərdə zibil qutularının olmaması isə problemin həllini çətinləşdirən amillərdəndir.
Mövcud vəziyyət kanalın və ətraf ərazilərin təmizlənməsini, tullantıların idarə olunmasına nəzarətin gücləndirilməsini zəruri edir.
