Quba rayonunun turizm üçün yararlı kəndlərinə gedən yol baxımsız haldadır. Bu haqda ShimalNews 21 iyun tarixində İctimai TV-yə istinadən xəbər verir.
Alıc-Digah kənd yolu uzun illərdir ki, bərbad vəziyyətdədir. Ötən gün yağan yağışlar isə yenidən yolda bir sıra çətinliklər yaradıb.
Ərməki kəndinin başlanğıc hissəsində bir sıra istirahət mərkəzləri hələ də yerli və xarici turistləri cəlb etməkdədir. Buna görə yolun 1 km-i illər öncə asfaltlanıb.
İnfrastrukturun olmaması səbəbindən adıçəkilən kəndlər Qubanın turizm və ekskursiya marşrutları sisteminə daxil edilməyib.
“Bu istiqamətdə dövlət-özəl əməkdaşlığının daha da genişləndirilməsi, dövlət tərəfindən müəyyən infrastruktur layihələrin həyata keçirilməsi, sahibkarlar tərəfindən isə turizm obyektlərinin yaradılması bu rayonların, bu kəndlərin inkişafına böyük bir dəstək verərdi”, - deyə ekspert Eynulla Xeyrullayev bildirib.
Avtomobil agentliyinin 9 saylı yol-istismar idarəsindən bildirildi ki, Ərməki, Alıc, Yuxarı Digah kəndlərini birləşdirən 7 km yol əsaslı təmir üçün nəzarətə götürülüb və yaxın günlərdə təmir işlərinə başlanılacaq.
