İsmayıllı rayonunun Xanagah kəndi ərazisində baş verən ölüm hadisəsi ilə bağlı məhkəmə prosesi keçirilib.
“Qafqazinfo”nun məlumatına görə, bu ilin fevralında “MAZ” markalı yük avtomobili ilə “Azsamand” markalı minik avtomobili toqquşub. Nəticədə 34 yaşlı Nigar Bayramova həyatını itirib. Onun sərnişini olduğu avtomobilin sürücüsü 31 yaşlı Elçin Əliyev cinayət işi üzrə təqsirləndirili bilinib.
Araşdırmalar zamanı məlum olub ki, Elçin daha əvvəl də yol qəzası törədib və məhkum edilib. Onun ayağında elektron qolbaq var idi və sürücülük hüququ məhdudlaşdırılıbmış.
Şəki Ağır Cinayətlər Məhkəməsində keçirilən prosesdə mərhum N.Bayramovanın atası Elçinə ağır cəza verilməsini xahiş edib:
“Hadisədən 1 saat sonra mənə məlumat verildi ki, qızım Elçinin maşınında olub, həmin maşın “Maz” markalı maşının altına girib. Hadisə yerinin şəkilləri mənə göndərildi. Qızım mənə İsmayıllı rayonundan Elçini bəyəndiyini demişdi. Nigara demişdim ki, həmin şəxs 2 dəfə cinayət məsuliyyətinə cəlb olunub. Həmçinin, Elçinin ayağında qolbaq var, savadsız bir adamdır, cəmiyyət arasında hörməti yoxdur. Təqsirləndirilən şəxsdən şikayətçiyəm və ona ən ağır cəzanın verilməsini xahiş edirəm”.
Məhkəmənin hökmü ilə Elçinə 6 il 6 ay həbs cəzası verilib. Onun sürücülük hüququ da həbsdən sonrakı 4 il üçün məhdudlaşdırılıb.
