Muğanlı-İsmayıllı-Qəbələ avtomobil yolunun yenidən qurulması zamanı ətraf mühitə daha az zərər verilməsi ilə bağlı təhlillər aparılıb və ən yaxşı variantın mövcud yolun genişləndirilməsi olduğuna qərar verilib. Bu haqda ShimalNews 11 may tarixində Apa-ya istinadən məlumat verir.
"Ekoloji baxımdan alternativlər dəyərləndirildi və qərara gəlindi ki, ən yaxşı variant mövcud yolun genişləndirilməsidir", - Dövlət Ekoloji Ekspertiza Agentliyi İdarə Heyətinin sədri Mirsalam Qənbərov bildirib.
Bundan əlavə, avtomobil yolunun yenidən qurulması ilə bağlı ictimai dinləmədə “Gidrotransproyekt” Elmi-tədqiqat mərkəzinin direktoru, “Evroskom” ASC-nin sədr müavini Natiq Əliyev çıxış edib. O bildirib ki, avtomobil yolunun eni layihə üzrə 8 metr azaldılıb.
"Xüsusi hallarda yolun ölçü parametrlərinin azaldılması ilə bağlı Nazirlər Kabinetinin qərarı var. Biz də bu 4 zolaqlı yolun çəkilməsi zamanı ətraf yaşıllığa daha az zərər verilməsi üçün yolun genişləndirilməsi zamanı yolun eninin 25 metr norma ölçüsündən 17 metrə qədər azaldılması ilə bağlı qərar verdik", - Natiq Əliyev söyləyib.
