Xaçmazdan olan qazi Tariyel Didarov qalib ölkənin zabiti olmağı haqqında danışıb. Bu barədə ShimalNews 20 iyul tarixində Azərtac-a istinadən məlumat verir.
Mayor Didarov 1980-ci ildə Bostançı kəndində doğulub. 1995-ci ildə Cəmşid Naxçıvanski adına Hərbi Liseyə qəbul olub. Üç ildən sonra isə Heydər Əliyev adına Azərbaycan Ali Hərbi Məktəbinin “Yerüstü artilleriya” kafedrasında təhsil almağa başlayıb.
Məktəbi bitirdikdən sonra 2003-cü ildə 1 illik zabit ixtisas kursunu keçib. Buranı da bitirərək Müdafiə Nazirliyinin müxtəlif hərbi birləşmələrində, əsasən də cəbhəyanı ərazilərdə xidmətə başlayıb.
Bu zaman gənc zabit Aprel döyüşlərində tabor komandirinin müavini kimi iştirak edib. Daha sonra isə Vətən müharibəsinin Füzuli cəbhəsində döyüşməyə başlayıb və Cəbrayıl ilə Xocavənd rayonlarının düşməndən azad olunması uğrunda şavaşıb.
2020-ci il oktyabrın 26-sı T.Didarov artilleriya kəşfiyyatçısı kimi fəaliyyət göstərir. Xocavənd rayonunun Qırmızı Bazar yaşayış məntəqəsi uğrunda savaşda onun yaxınlığında tank mərmisi partlayır. Döyüşçümüz ağır yaralanaraq komaya düşür. Həkimlərin səyi nəticəsində onu həyata qaytarmaq mümkün olur. Tariyel 2-ci qrup müharibə əlili olur.
“Bütün dünya təcrübəsində var ki, müharibə iştirakçıları postmüharibə dövründə psixoloji gərginlik və əsəb keçirirlər. Biz döyüşlərdə ən yaxın yoldaşlarımızı itirmişik. Döyüşçü qardaşlarımız qucağımızda şəhid olub. Müharibə iştirakçılarının psixoloji reabilitasiyası olduqca vacibdir. Fikrimcə, bu işlə yalnız təyinatı üzrə səhiyyə müəssisələri məşğul olmamalıdır. Gücümüzü səfərbər edib qazilərimizə dəstək olmalı, onların hər birinə fərdi yanaşmalıyıq. Mən zabit kimi böyük qürur hissi keçirirəm. Biz qalib ölkənin müzəffər hərbçiləriyik. Çox şükür ki, bütün xalqımız da bu qüruru yaşayır. Qalib ölkənin zabiti olmaq böyük fəxrdir”, - deyə ehtiyatda olan mayor T.Didarov bildirib.
Hərbiçimiz bildirib ki, 20 ildən çox hərbi xidmətdə olub:
“Buna görə də mənə dövlət tərəfindən yüksək pensiya təminatı ayrılıb. Bundan əlavə, mənə Azərbaycan Respublikası Prezidentinin fərdi təqaüdü təyin edilib. Təhsil Nazirliyi tərəfindən də işə götürülmüşəm. Hazırda Xaçmaz rayon İsmət Rəsulov adına Əhmədoba kənd tam orta məktəbində “Çağırışaqədərki hazırlıq” fənnini tədris edirəm”.
Tariyel Didarov Vətən müharibəsində göstərdiyi xidmətlərinə görə Azərbaycan Respublikasının Prezidenti İlham Əliyevin Sərəncamı ilə “Cəsur döyüşçü”, “Xocavəndin azad olunmasına görə”, “Cəbrayılın azad olunmasına görə” və “Füzulinin azad olunmasına görə” medalları ilə təltif edilib.
