Qudyalçayın Xaçmaz şəhəri və Köhnə Xaçmaz kəndi yaxınlığından keçən hissəsində ekoloji fəlakət yaşanır.
Shimal.News-un əldə etdiyi görüntülərdə çay yatağının zibilliyə çevrildiyi açıq-aşkar görünür.
Fətəlixan küçəsi istiqamətində vəziyyət daha acınacaqlıdır. Ərazidə zibil qutuları olmadığından ətraf məhəllələrin bütün tullantıları çaya atılır. Nəticədə çayın kənarlarında və yatağında “zibil dağları” meydana gəlib.
Çay yatağında plastik, poliotelen, şüşə qırıqları, pamperslər, köhnə mebellər, uşaq oyuncaqlarından tutmuş, tikinti materiallarına, televizor ekranına, qırıq kresloya qədər rast gəlmək mümkündür.
Bu görüntü ətrafda yaşayanları və aiddiyyatı qurumları narahat etməsə də, ən böyük “dağı” ekologiyaya çəkmiş olur. Çünki yaz və payız aylarında çaya gələn sel qalaqlanan tullantıları da Xəzər dənizinə sürükləyir.
Köhnə Xaçmaz kəndində də vəziyyət həqiqətən ürək bulandırır. Əksər evlərin tullantıları çaya tökülür və açıq-aydın görünür. Ətrafda bir sıra evlərin kanalizasiya sularının Qudyalçaya axıdılması da əlavə problem yaradır.
İnsanlar təbiətimizin incisinə sanki qənim kəsilib. Gah çayın Qubadan keçən hissəsi zibilliyə çevrilir, gah daş karxanaları çay yatağını xarabalığa çevirir, gah da çayın Xaçmazdan keçən hissəsində zibil poliqonu yaradılır.
Maraqlısı odur ki, bura dağlıq, meşəlik bir ərazi deyil. Xaçmaz şəhərinin ən mənzərəli yeridir. Ola bilər ki, İcra Hakimiyyətinin, icra nümayəndəliyinin, kənd bələdiyyəsnini və Dövlət Ekoloji Təhlükəsizlik Xidmətinin əməkdaşları bircə dəfə də burada olmayıblar? Yolları buradan düşməyibsə də bir dərddir, düşüb biganə qalıblarsa da, bir ayrı dərd...
Göz qabağında olan ekoloji çirklənməyə göz yummaq isə, artıq dərd deyil, məsuliyyətsizlikdir, vicdansızlıqdır!
Qudyalçay isə, acığını, hirsini ildə iki dəfə güclü sel gətirməklə çıxır. Üzərindəki körpüləri dağıdır, torpaq uçqunlarına səbəb olur. Çayı ekoloji terror qurbanına çevirənlər görəsən təbiətin qəzəbindən qurtara biləcəkmi?!
View this post on Instagram
