Xaçmazda ekoloji mühitə ziyan vurulması faktları ilə bağlı cinayət işləri başlanılıb. Bu barədə ShimalNews 9 avqust tarixində Baş Prokurorluğa istinadən məlumat verir.
Vətəndaşların Azərbaycan Respublikasının Baş Prokurorluğuna daxil olmuş ərizələri, media və səlahiyyətli dövlət qurumlarının məlumatları əsasında Cinayət təqibindən kənar icraatlar idarəsində rayon ərazilərində qanunsuz ağac kəsmə faktları ilə bağlı araşdırma aparılıb.
Nəticədə meşə fonduna daxil olan ağacların və kolların qanunsuz kəsilməsi, həmin ərazinin qanunsuz şumlanması və əkilməsi faktları aşkar edilib.
Faktla bağlı Cinayət Məcəlləsinin 188.1 (Torpaq üzərində mülkiyyət, istifadə və ya icarə hüququnu pozma), 255.1 (Yerin təkinin qorunması və istifadəsi qaydalarını pozma), 259.2.3 və 259.2.4-cü (Qanunsuz ağac kəsmə) maddələri ilə cinayət işləri başlanılıb və istintaqın aparılması üçün aidiyyəti üzrə daxili işlər orqanlarına göndərilib.
