Xaçmaz rayon ərazisində yolların kənarlarında şam ağaclarının çox sayda əkilməsi səbəbi açıqlanıb. Bu haqda ShimalNews 17 aprel tarixində “Apa”ya istinadən məlumat verir.
Əvvəllər ağaclar Gəndob-Yalama yolu boyunca, eləcə də Xaçmazda yolların kənarlarında yaşıllıq olmayan ərazilərdə əkilirdi. Sakinlər bildirirlər ki, indi əkin üçün yer olmasından ötrü iri gövdəli ağaclar da kəsilir.
Tingçiliklə məşğul olan bağban Qurban Qəribov da son illər şam ağaclarına olan tələbatın kəskin artdığını bildirir. Əkilməsinə üstünlük verilən Eldar şamları isə ən münasib qiymətə satılan ağaclar sırasındadır.
Kənd təsərrüfatı mütəxəssisi Mədət Qurbanov isə deyir ki, şam ağacına üstünlük verilməsinin səbəbi bu ağacın çox qulluq tələb etməməsi ola bilər.
Məsələ ilə bağlı Xaçmaz Rayon İcra Hakimiyyətindən bildirilib ki, son 4 ildə rayon ərazisində 16 mindən çox ağac əkilib. Həmin ağacların böyük əksəriyyətini həmişəyaşıl ağaclar təşkil edib. Buna səbəb iynəyarpaqlı ağacların daha dözümlü olması qeyd edilib. Yol kənarlarındakı kötüklərə gəlincə, həmin kötüklər quruyan və yolda hərəkət edən avtomobillər üçün təhlükə yaradan iri gövdəli ağaclara aiddir və həmin ağaclar səlahiyyətli qurum tərəfindən kəsilərək ərazidən götürülüb.
Ekoloqlar isə bildirirlər ki, şam ağacları tozlanma vaxtı insan orqanizmi üçün olduqca zərərlidir.
