Xaçmaz şəhərinin Nəriman Nərimanov küçəsində əhalinin park kimi istifadə etdiyi ərazi hasarlanıb. Bu barədə ShimalNews 21 iyul tarixində Real TV-yə istinadən məlumat verir.
80 nömrəli binanın sakinlərinin sözlərinə görə, 20-25 il öncə ərazidəki park onlar tərəfindən salınıb. Burada müxtəlif növ meyvə, eləcə də həmişəyaşıl ağaclar əkilib. Bir müddət öncə isə bildirilmişdir ki, bu ərazidə müasir park salınacaq.
Bu xəbərin sevinc hissi çox çəkməyib. Məlum olub ki, ərazi 4 nəfər vətəndaşa ev tikmək məqsədilə həyətyanı sahə kimi verilib.
Sakinlər hesab edir ki, bu sənədləşmədə saxtakarlığa yol verilib. Onları ən çox narahat edən isə illər öncə əkib və qulluq etdikləri ağacların kəsilməsidir.
Məsələ ilə bağlı yeni sahiblərdən birinə müraciət etdikdə o, müsahibə verməkdən imtina edib, lakin bildirib ki, torpaq sahəsinin ona məxsus olmasına dair əlində rəsmi sənəd var.
Ərazinin nə zaman yeni sahiblərinə verilməsini Xaçmaz bələdiyyəsindən öyrənilib. Sədr Tural Məlikov bildirib ki, qurum və rayon icra hakimiyyəti bu yerdə park salmaq istəyirdilər. Lakin qeyd olunan ərazini 1995-ci ildə ev tikmək məqsədilə ayrılması məlum olub. O, zaman bələdiyyələr mövcud deyildi, onlar yalnız 1999-cı ildə yaradılıb.
Hüquq sahəsi üzrə ekspertlər yaranmış vəziyyətlə bağlı öz rəylərini bildiriblər. Həyətyanı torpaq sahiblərinin daşınmaz əmlakın dövlət reyestr xidmətindən çıxarışları olduğu halda məsələ məhkəmə səviyyəsində həllini tapmalıdır.
Bina sakinləri məhkəməyə müraciət edərək ilkin sənədlərin saxta olduğunu və ərazinin ev tikmək üçün uyğun olmadığını əsaslandırmalıdırlar. Yalnız onların iddiasının təsdiqini tapdığı halda həmin çıxarışlar məhkəmə qərarı ilə ləğv edilə bilər.
