Xaçmazda tatarların milli bayramı Sabantuy təntənəli şəkildə qeyd olunub. Bu barədə ShimalNews 24 iyun tarixində “Azərtac”a istinadən məlumat verir.
İyunun 23-ü Nabranda keçirilən tədbirdə Diasporla İş üzrə Dövlət Komitəsinin (DİDK) şöbə müdiri Ruslan Quliyev, Rusiyanın Azərbaycandakı səfiri Mixail Yevdakimov, Rusiyanın Tatarıstan Respublikasının mədəniyyət nazirinin müavini Dəmir Natfullin və digər qonaqlar iştirak ediblər.
Bayram şənliyində tatarların milli musiqi və rəqsləri, milli mətbəx təamları, əyləncəli müsabiqələr təqdim edilib. Eləcə də Pəhləvanlar milli güləş növü olan “kureş”də güclərini sınayıblar.
Kənd təsərrüfatı ənənələri və aqrar mədəniyyətlə bağlı olan Sabantuy tarlalarda məhsul yığımının başa çatması münasibətilə keçirilən bayramdır. Onun ölkəmizdə ənənəvi şəkildə qeyd olunmasının xalqlarımız arasında dostluq münasibətlərinin göstəricisi olduğu vurğulanıb.
