Xaçmaz rayonunun Armudpadar kəndində yaşayan bağban 8 ildir “konfet (şokolad) ağacı” kimi tanınan “şirin hoveniya” becərir. Bu barədə ShimalNews 5 oktyabr tarixində Apa TV-yə istinadən məlumat verir.
İxtisasca aqronom olan Qurban Qəribov ömrünün 20 ildən çoxunu dekorativ bitkilərə həsr edib. Onun yetişdirdiyi bu bitki dadı və görünüşü ilə hər kəsdə maraq oyadır. Ağacın meyvəsi formaca maral buynuzuna oxşayır. Ona “konfet ağacı” adı meyvələrinin şirinliyi 35%-dən yuxarı olduğuna görə verilib.
Təbabətdə “şirin hoveniya”nın meyvəsindən asma və mədə-bağırsaq xəstəliklərinə qarşı istifadə edilir.
Azərbaycana sözügedən bitki ilk dəfə 1936-cı ildə Çindən gətirilib və Göyçayda əkilib. Lakin həmin il güclü şaxta olduğundan əksər ağaclar məhv olub. Hazırda Göyçayda, Şəmkirdə və Xaçmazda bir neçə nümunəyə rast gəlinir. Q.Qəribov onların sayını çoxaldıb, təsərrüfatını genişləndirmək niyyətindədir.
[video width="1920" height="1080" mp4="https://shimal.news/storage/photos/2023/10/Sequence-01_16.mp4"][/video]
