Xaçmazın Çaykənarı kənd orta məktəbində aşkar olunan nöqsanlarla bağlı açıqlama verilib. Bu barədə ShimalNews 8 avqust tarixində Report-a istinadən məlumat verir.
Quba-Xaçmaz Regional Təhsil İdarəsi adıçəkilən məktəbin keçmiş müəllimi Rəvanə Məmmədovanın müəssisənin fəaliyyəti haqda səsləndirdiyi bir sıra iddialara aydınlıq gətirilib.
Məsələ ilə bağlı 2021-ci ilin noyabr ayında Xaçmaz Rayon Təhsil Şöbəsi tərəfindən monitorinq aparılıb:
"Məktəbin direktor əvəzi Nuriyyə Nurməmmədova və təşkilati işlər üzrə direktor müavini Rəşad İsayevin işlərində müəyyən nöqsanlar (aşkarlanan nöqsanlara görə həmin şəxslər haqqında intizam tənbeh tədbirləri görülüb) aşkarlansa da, iddia edilən fikirlər təsdiqini tapmayıb. Belə ki, kitabxanada oxucu kartlarının pulla satılması, kitabxananın gündə 15 dəqiqəlik açılması, ocaqçının sobaları yandırmaması, müəllimlərin içkili dərsə gəlməsi, şagirdlərə dərman preparatlarının paylanılması fakları təsdiqlənməyib. 2022-ci ilin iyununda Quba-Xaçmaz Regional Təhsil İdarəsinin müdiri Rüfət Hacıyev və Xaçmaz rayonu üzrə təhsil sektorunun müdiri İnqilab Musayev adıçəkilən məktəbdə olublar. Bu zaman və daha öncəki aşkarlanan nöqsanların da aradan qaldırılmadığı üçün məktəbin təsərrüfat işləri üzrə direktor müavini və direktor əvəzi işdən azad ediliblər. Nuriyyə Nurməmmədova məktəbdə müəllim kimi saxlanılıb".
Həmçinin bildirilib ki, 2022-ci ilin iyun ayında Xaçmaz rayonu üzrə bir neçə müəllim və Rəvanə Məmmədovanın səbəb göstərmədən bir neçə gün işdə olmadıqları aşkarlanıb. Onların həmin günlərə olan əməkhaqları dayandırılıb.
