Quba-Xaçmaz Regional Təhsil İdarəsinin müdiri Coşqun Əliyev və Xaçmaz Rayon İcra Hakimiyyətinin başçısı Elnur Rzayev test imtahanında yüksək nəticə göstərən müəllimlərlə görüş keçiriblər. Bu haqda ShimalNews 8 iyul tarixində xəbər verir.
Təhsilverənlərin test imtahanında yüksək nəticə göstərən müəllimlərlə görüş keçirilib.
Xaçmaz rayonunda Azərbaycan Respublikası Elm və Təhsil Nazirliyi tərəfindən keçirilən təhsilverənlərin sertifikatlaşdırılması prosesinin test imtahanı mərhələsində yüksək bal toplayan müəllimlərlə görüş keçirilib.
Müəllimlərə qazandıqları uğur münasibəti ilə təbriklər deyilib və Azərbaycan müəlliminin keçdiyi uzun və şərəfli yoldan danışılıb.
Coşqun Əliyev Elm və Təhsil Nazirliyi tərəfindən keçirilən təhsilverənlərin sertifikatlaşdırılması prosesinin test imtahanı mərhələsinin nəticələri barədə məlumat verib.
Bildirilib ki, Xaçmaz rayonu üzrə 343 müəllim imtahanlarda iştirak edib. Onlardan 128 nəfəri 50 baldan yuxarı toplayıb. 54 müəllimin imtahan nəticələri 55 baldan yüksək olub. Müəllimlərdən 25 nəfəri 55, 13 nəfər 56, 4 nəfər 57, 3 nəfər 58, 6 nəfər 59, 3 nəfər isə ən yüksək nəticəni göstərərək 60 bal toplayıb.
Sonda müəllimlər Fəxri Fərmanla mükafatlandırılıblar.
