Fövqəladə Hallar Nazirliyinin (FHN) Şimal Regional Mərkəzi tərəfindən Xaçmaz rayonunda təlim keçirilib. Bu haqda ShimalNews 5 iyul tarixində “Report”a istinadən məlumat verir.
Təlim "Azərbaycan Respublikasının 2024-cü il üçün Mülki müdafiə tədbirləri planı" çərçivəsində "İrimiqyaslı fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə edilməsinin təşkili" mövzusunda baş tutub.
İştirakçılar sırasında FHN Şimal Regional Mərkəzinin rəisi polkovnik Fuad İlyasov, Xaçmaz rayon icra hakimiyyətinin başçısı Elnur Rzayev, FHN-in aidiyyəti qurumlarının nümayəndələri, rayon Fövqəladə Hallar Komissiyası (FHK), İcra Hakimiyyətinin Mülki müdafiə qərargahı, rayonun mülki müdafiə xidmətləri, ərazi və obyekt mülki müdafiə dəstələri, idarə, müəssisə və təşkilatların rəhbərləri və mülki müdafiə sahəsində cavabdeh şəxslər olublar.
Kompleks təlimə FHN-in və rayonun aidiyyəti qurumlarının hərbiləşdirilməmiş mülki müdafiə dəstələrinin ümumilikdə 284 nəfərdən ibarət şəxsi heyəti və 51 ədəd texnikası cəlb edilib. Mülki müdafiə dəstələri və xidmətlərinin qarşılıqlı fəaliyyəti uğurla təşkil edilib və qarşıya qoyulmuş məqsədlərə nail olunub.
