Xaçmaz rayonunun Padar kəndində örüş sahələrinin icarəyə verilməsi sakinlərə çətinlik yaradır. Bu barədə ShimalNews 9 iyul tarixində Real TV-yə istinadən xəbər verir.
Sakinlər bildirirlər ki, kəndin 28 hektar örüş sahəsi var idi. Lakin 2019-cu ildə sabiq bələdiyyə sədri bu ərazini 2 vətəndaşa uzunmüddətli icarəyə verib. O vaxtdan fermerlər mal-qarasını otarmağa yer tapmır.
“Biz heyvanlarımızı Ağçaya aparırıq, lakin orada sellər çox gəlir, mal-qaramız tələf olur. Kənddə mal saxlamaq mümkün deyil”, - deyə kənd sakini Ceyhun Dadaşov bildirib.
“Özünüməşğulluqdan 2019-cu ilin yanvar ayında mənə 21 baş heyvan veriblər. İndi də heyvanlarım yerindədir. Onları otarmağa yer tapa bilmirəm. Dedilər öz pay torpağımda otarım. O isə kanal ərazisinə düşür. Mən bu heyvanı necə saxlamalıyam? Mənim kəndimdə örüş ola-ola, onu kimsə istifadə edir”, - deyə fermer Səməd Kərimov söyləyib.
Örüş əraziləri 3 il öncə dəmir torla hasara alınıb və burada bağ sahəsi salınıb. Sakinlər hesab edir ki, bütün kəndin bu əraziyə ehtiyacı olduğu vaxtda, onun yalnız 2 nəfərə icarəyə verilməsi düzgün deyil.
Məsələ ilə bağlı Padar kəndinin tabe olduğu Yergüc bələdiyyəsinə müraciət olunub.
“2018-ci ildə məndən öncəki bələdiyyə tərəfindən həmin torpaqlar üzərində mülkiyyət hüququ qazanılmışdır. Mülkiyyət hüququnu qazanmaq üçün məsələ müvafiq instansiyalardan keçir və, eyni zamanda mülkiyyət hüququ qazanılandan sonra hərrac komissiyasına təqdim olunur. Hərracda isə bəli, 5 hektar 75 sot örüş təyinatlı torpaq sahəsi var. O, bələdiyyə mülkiyyətinə aiddir, ətrafında isə əkin təyinatlı torpaq sahələridir. Hərrac zamanı vətədaş qalib seçilmiş və həmin torpaq sahəsi ona icarəyə verilmişdir. Bu günə qədər də icarə müqaviləsinə əsasən təyin olunan qiymət bələdiyyə büdcəsinə hər il vaxtı-vaxtında ödənilməkdədir”, - bələdiyyə sədri Özal Əspəndiyev bildirib.
O, həmçinin əlavə edib ki, sahələr vətəndaşlara tam qanuni şəkildə icarəyə verildiyi üçün, yalnız tərəflər arasında mübahisə yarandığı təqdirdə icarə müqaviləsi ləğv edilə bilər. Hazırda hər hansı belə səbəb yoxdur. Həmçinin bələdiyyənin balansında ümumi istifadə üçün örüş sahəsi yoxdur. Buna görə sakinlər yalnız pay torpaqlarından istifadə etməklə heyvandarlıqla məşğul ola bilərlər.
[caption id="attachment_20426" align="alignnone" width="300"]
Foto Real TV[/caption]
